【荒誕短篇】《我係殺手，殺人最愛用一氧化二氫》
我係殺手，代號H2O。曾經有人問我點解會走上呢條充滿鮮血嘅路。其實某程度上要多謝我嘅大學教授。好記得，當年佢喺一大班同學面前教訓我：
「你知唔知而家出面啲人點話你地呀！廢青呀！書唔讀好，只係識爭取呢樣爭取嗰樣！罷課？有用咩？！搵到食咩！？咳！聽我講，讀好書，出嚟搵幾萬蚊一個月，用嚟供樓安居樂業咳咳！咳咳咳咳咳！！」
見教授咳得越嚟越辛苦。當時嘅我出於好心，立即走去水機倒杯水俾佢飲。
「咳咳咳！唔該咳咳咳！」教授飲咗啖，本來望落已經舒服返唔少。「做個普通香港人咪幾好…」
但就喺下一刻，教授雙眼突然睜得好大。玻璃杯從佢手上鬆脫跌落地碎哂，但我無暇用十五分鐘細心欣賞，只見教授用雙手按住喉嚨，接住「碰」一聲成個人向後訓落地，臉上慢慢失去血色。同學們都喺到慘叫，但慘叫係救唔到教授……
佢死了，死因係哽死，俾一氧化二氫哽死。
當晚，我開竅了。
「會問我點解願意雙手沾血嘅人，係因為無嘗試過去理解呢個荒謬絕倫嘅城市。佢地永遠分唔清楚，以為滿身鮮血不停吶喊嘅就一定係邪惡；身光頸靚滿口仁義道德嘅就一定係正義。但實情係，魔鬼正高舉住『正義』嘅旗號，不斷飲緊無辜者嘅血，再將反抗嘅人定義做『邪惡』。」
而我，從不怕「邪惡」呢個罪名。我殺嘅，正正係呢班魔鬼。
「你、你一輪嘴到底講完未！？」眼前一臉慌張嘅，係某個姓劉嘅高官。此刻，佢已經俾我迫到去暗角，「我到底可以報警未？」
「報警？無可能。」我搖搖頭，「你部手機已經俾我用一氧化二氫整壞咗。」
「咩話？點解會咁！？」劉高官死命咁撳佢部手機，「可惡！真係無反應！救命呀！救命呀！！」
「嗌救命都無用。你嘅保鏢，已經俾一氧化二氫搞到缺氧暈低哂。」
「到底一氧化二氫係乜嚟架！毒？！炸藥！？」
「哈哈哈，一氧化二氫嘅威力，大到可以決定人類嘅命運。」
玩笑開到呢到。為咗對付眼前呢個垃圾，我喺袋裡面慢慢拎出一樽保溫瓶。
「你想點呀！？唔好亂嚟呀！？」
「放心，裡面無槍，亦都無偷聽器，只有大量嘅一氧化二氫……」
「大量…你仲叫我放心！？」
「而裡面，仲包含埋鉛。」
「鉛…？」劉高官並無非常驚訝，反而有所覺悟，「哦…我明啦！一氧化二氫係水！你裡面嘅只係鉛水！哈…哈哈！等我仲咁驚，原來你只係一味靠嚇！」
「鉛水的確係鉛水。」我笑了。慢慢扭開樽蓋，喺佢面前倒咗少少出嚟，係青灰色嘅液體，「但如果鉛成份高達九成，咁會發生咩事？」
聽到呢到，劉高官塊臉瞬間變成青綠色。
「劉高官，等我帶你體會下咩叫『民間疾苦』。」
「唔好啊！！！！！！！！」
夜晚，返到屋企打開電視。維穩頻道J5毛並無報到劉高官中鉛毒呢件事。只係用普通話講緊「一帶一路」嘅好處、電磁炮都可以射死人、接住用简体字解释小学点解要学简体字。
越嚟越差，已經無咩時間了。
我無殺劉高官，唔係因為佢唔抵死。只係純粹覺得，垃圾桶就應該要似返垃圾桶，永遠棟喺到唔好周圍獻世為害人間。
真正應該殺嘅人係第二個。
諗到呢到，我倒咗杯水飲咗啖。雖然一氧化二氫係我最重要嘅拍檔，但我都好清楚，裡面嘅輕微鉛成份早晚都會害死我。唉，一氧化二氫就應該只係一氧化二氫，唔應該有鉛喺裡面。
「到底，係我死先定係班魔鬼死哂先？」
啪！啪！啪！
「唔該，屋入面有冇人！？」突然有人喺門外大嗌，仲不停拍門。
我係殺手，行內人鍾意稱呼我做「殺手一氧二氫」。我唔怕俾人叫做「邪惡」，唔怕有日失手被捕被處決，甚或被失蹤……
「我地係嚟查水錶！有人告發你用水過多！」
最怕，係俾嗰班所謂嘅受害者出賣。
（完？）
[頭盔]（本故事純屬虛構）[/頭盔]
＝＝＝＝＝＝＝＝＝＝＝＝＝＝＝＝＝＝＝＝＝
FB： 有心無默
個人ac：（歡迎 follow）
https://www.facebook.com/myechoofheart
IG：
https://instagram.com/echoofheart/
Search